Sgiacchi et son épouse, Filusella, habitent à Bastia, place du théâtre. Alors qu'une animation inhabituelle règne sur cette place, Sgiacchi en demande la raison à Filusella. De cette scène naissent des quiproquos sur fond de folklore bastiais. ©Electre 2024

Cosa ci sarà sta sera o teatru ?

Rumanzu

Stu rumanzu di Georges de Zerbi cambia tonu à pettu à i primi dui, per prupòneci un altru modu d'entre in una realità chi tene à core à u so autore, Bastia. Ma sta volta u tema bastiacciu hè cunsideratu da u latu ridiculu, vene à di prupensu à fà ride ritrattendu a ghjente è e cose cù u mirinu cômicu. Osservatore fine è precisu di a sucietà di a vechja capitale ghjcnuvese ind'i so cumpurtamenti d'ogni ghjornu, u scrittore ci ne rende i persunagi scherzosi, u parlà savuritu, e situazione sfumacciute, i caràtteri infiarati è soprattuttu u sensu di a magagna arradicatu prufondu ind'è l'indule di i bastiacci.

Rumanzu hè, di siguru, vale à dì cun persunagi inventati, stonde imaginarie, situazione ingiardinate, ma iscritte in un quatru veru, cun diàlughi ispirati à l'abituale chjama è rispondi serratu trà persunagi, à mo'di quelli ghjucatori chì si rimàndanu a palla da sopra à a reta.

Sottu à a penna di de Zerbi, a vita corre alegra è annacqua gurgugliante i carrughji di Bastia cum'è u suchju chì si sparghje à cullà, da u fustu finu à i ramicelli, per tene drittu è fieru l'àrburu frundutu cù a so ombra rinfriscante è salutìfera. À ogni capitulu, pàgina dopu pàgina, a storia s'arricchisce di persunagi burlasconi chì s'intrèccianu ind'u racontu è chì danu à stu rumanzu a so forza còmica, a vis comica di i Rumani, fatta di qui pro quo è di situazione inaspettate, marcate da un zìnzicu di pazzìa umana è d'insustenìbule legezezza, ma chì rende l'imaginariu cusì vicinu à u veru !

Rumanzu scrittu per fà ride, bella sigura, è ancu per fà scaccanà da tantu chì tutti l'ingredienti sò stati scelti cun assai ricerca è ricchezza di mezi. Ma si pò misurà, dinù, longu u filu di u racontu, è guasi tuccà per ditu, u fàscinu chì Bastia stampa ind'u spìritu di l'autore è l'attaccamentu chì Georges de Zerbi porta à a so cità natìa. Stu rumanzu hè à tempu una grande òpera còmica è un puema à a gloria di Bastia.